2Th 2 | NdeIBE | STEP | Mayelana lokuza kweNkosi yethu uJesu Khristu, lokubuthana kwethu kuyo, siyalicela, bazalwane,

2 Thessalonians 2

Umuntu Ongelamthetho

1 Mayelana lokuza kweNkosi yethu uJesu Khristu, lokubuthana kwethu kuyo, siyalicela, bazalwane, 2 ukuba lingaphangi likhathazeke kumbe lethuswe ngobunye ubuphrofethi, umbiko loba incwadi okungathi ivela kithi, kuthiwa usuku lweNkosi selufikile.

3 Lingavumeli muntu elikhohlisa langayiphi indlela, ngoba lolosuku kaluyikufika umvukela uze wenzakale lomuntu ongelamthetho abonakaliswe, umuntu omiselwe ukubhujiswa.

4 Uzaphikisa azikhukhumeze ezintweni zonke ezithiwa Nkulunkulu loba ezikhonzwayo, aze azihlalise ethempelini likaNkulunkulu, amemezele ukuthi yena unguNkulunkulu.

5 Kalisakhumbuli yini ukuthi ngisekini ngangijwayele ukulitshela izinto lezi? 6 Khathesi selikwazi okumvimbelayo, ukuze abonakaliswe ngesikhathi esifaneleyo. 7 Ngoba amandla afihlakeleyo okungabi lamthetho asesebenza; kodwa lowo owavimbelayo khathesi uzaqhubeka esenza njalo aze asuswe endleleni.

8 Lapho-ke lowo ongelamthetho uzabonakaliswa, lowo iNkosi uJesu ezamchitha ngomoya womlomo wayo imqede ngenkazimulo yokufika kwayo. 9 Ukufika kwalowo ongelamthetho kuza kuya mayelana lomsebenzi kaSathane obonakaliswa kuzo zonke izinhlobo zezimangaliso zamanga, izibonakaliso kanye lezimanga, 10 kanye lezinhlobo zonke zobubi obukhohlisa ababhubhayo. Bayabhubha ngoba bala ukuthanda iqiniso ukuba basindiswe. 11 Ngenxa yalokhu uNkulunkulu ubehlisela inkohliso elamandla ukuze bakholwe amanga, 12 ukuze balahlwe bonke abangalikholwanga iqiniso kodwa bathokoziswa yibubi.

Qinani

13 Kodwa kufanele sibonge uNkulunkulu kokuphela ngenxa yenu, bazalwane abathandwa yiNkosi, ngoba uNkulunkulu walikhetha kusukela ekuqaleni ukuba lisindiswe ngomsebenzi ongcwelisayo kaMoya langokukholwa eqinisweni.

14 Walibizela kulokhu ngevangeli lethu, ukuze lihlanganyele enkazimulweni yeNkosi yethu uJesu Khristu. 15 Ngakho-ke, bazalwane, qinani libambelele ezimfundisweni esalinika zona, langabe ngelizwi lomlomo loba ngencwadi.

16 Sengathi iNkosi yethu uJesu Khristu uqobo kanye loNkulunkulu uBaba, owasithandayo kwathi ngomusa wakhe wasinika isikhuthazo esingapheliyo lethemba elihle,

17 angalikhuthaza aliqinise kuzo zonke izenzo ezinhle lasemazwini amahle.